 |
| ពលរដ្ឋខ្មែរ-អាមេរិកាំង ធ្វើបាតុកម្មនៅមុខរដ្ឋសភាសហរដ្ឋអាមេរិក ទាមទារឲ្យរដ្ឋាភិបាលអាមេរិក ដាក់ទណ្ឌកម្មផ្នែកសេដ្ឋកិច្ច និងការទូតទៅលើរដ្ឋាភិបាលលោកនាយករដ្ឋមន្ត្រី ហ៊ុន សែន កាលពីថ្ងៃទី១០ មិថុនា ឆ្នាំ២០១៦។ RFA/Yun Samean |
សមាជិកក្រុមប្រឹក្សាភិបាលនៃអង្គការសម្ព័ន្ធមិត្តខ្មែរ-អាមេរិកាំង នៅក្រុងម៉ុងរ៉េអាល់ (Montreal) ប្រទេសកាណាដា អ្នកស្រី ជីវ សោភា មានប្រសាសន៍ប្រាប់អាស៊ីសេរី តាមទូរស័ព្ទថា ស្ថានការណ៍
បច្ចុប្បន្ន មានសភាពធ្ងន់ធ្ងរកាន់តែខ្លាំងៗឡើង រហូតដល់ចុងក្រោយនេះ អាជ្ញាធរកម្ពុជា បានចាប់ឃុំឃាំងលោក កឹម សុខា ចោទពីបទក្បត់ជាតិ។
អ្នកស្រីបន្តថា បាតុកម្មនៅថ្ងៃសៅរ៍ ទី៩ ខែកញ្ញា ខាងមុខ នឹងមានប្រជាពលរដ្ឋយ៉ាងតិច ៥០០នាក់មកពីសហគមន៍ខ្មែរនៅតូរ៉ុនតូ (Toronto) អូតាវ៉ា (Ottawa) និងមកពីទីក្រុងជាច្រើនទៀត មកចូលរួមនៅខាងមុខវិមានរដ្ឋសភា នៅក្រុងអូតាវ៉ា៖ «គោលដៅសំខាន់របស់យើងគឺទាមទារយុត្តិធម៌ដើម្បីពលរដ្ឋខ្មែរទាំងអស់ យើងទាមទារសិទ្ធិទទួលបានព័ត៌មាន ដូចយើងដឹងហើយថ្មីៗនេះគេបិទកាសែត ឌឹ ខេមបូឌា ដេលី ដេញអង្គការ អិន.ឌី.អាយ (NDI)។ ថ្មីៗនេះ គឺចាប់លោក កឹម សុខា ហើយយើងទាមទារឲ្យដោះលែងលោក ដោយគ្មានលក្ខខណ្ឌ និងសកម្មជនផ្សេងៗទៀតដែលគេចាប់ដាក់ពន្ធនាគារ...»។
ចំណែកសហគមន៍ខ្មែរនៅប្រទេសអូស្ត្រាលី និងនៅប្រទេសបារាំង ឯណោះវិញ ក៏មានគម្រោងរៀបចំបាតុកម្មដ៏ធំ ដែលមានមនុស្សចូលរួមរាប់រយនាក់ផងដែរ នៅថ្ងៃសៅរ៍ ទី៩ ខែកញ្ញា នេះដែរ។
ប្រធានសមាគមសាមគ្គីខ្មែរ នៅប្រទេសបារាំង លោក យុន សារុន ក៏បានបញ្ជាក់ប្រាប់ថា គោលបំណងសំខាន់គឺស្នើសុំឲ្យដោះលែងលោក កឹម សុខា និងសុំឲ្យសហគមន៍អន្តរជាតិ ដាក់គំនាបដល់រដ្ឋាភិបាលកម្ពុជា។
លោកបន្តថា អ្នកចូលរួមប្រមាណពី ៣០០ ទៅ ៥០០នាក់ ក៏នឹងទាមទារឲ្យប្រទេសហត្ថលេខីនៃសន្ធិសញ្ញាសន្តិភាពក្រុងប៉ារីស ឆ្នាំ១៩៩១ ត្រូវយកចិត្តទុកដាក់ដោះស្រាយពីសភាពការណ៍តានតឹងនៅកម្ពុជា៖ «សំខាន់គឺទាមទារឲ្យលោក ហ៊ុន សែន ដោះលែងលោក កឹម សុខា ជាបន្ទាន់ និងគ្មានលក្ខខណ្ឌដើម្បីឲ្យគេគោរពនូវសន្ធិសញ្ញាក្រុងប៉ារីស ២៣ តុលា ឆ្នាំ១៩៩១។ ដើម្បីឲ្យគេគោរពសិទ្ធិសេរីភាពប្រជាពលរដ្ឋខ្មែរ និងដើម្បីឆ្ពោះទៅរកការបោះឆ្នោតជាតិឆ្នាំ២០១៨ ដោយសន្តិភាព សេរី និងយុត្តិធម៌»។
តំណាងរាស្ត្រខ្មែរ-អូស្ត្រាលី លោក ហុង លីម ដែលដឹកនាំបាតុកម្មធ្វើឡើងនៅមុខសាលាក្រុងស្ព្រីវែល (Springvale) ក្នុងរដ្ឋវ៉ិកតូរីយ៉ា (Victoria) នៅថ្ងៃសៅរ៍នេះ មានប្រសាសន៍ថា ពលរដ្ឋខ្មែរ-អូស្ត្រាលី មិនអាចនៅស្ងៀមឡើយ ចំពោះវិធានការរបស់រដ្ឋាភិបាលលោក ហ៊ុន សែន ដែលបានរំលោភអំណាច និងព្យាយាមកម្ចាត់មេដឹកនាំគណបក្សប្រឆាំងដើម្បីបន្តការដឹកនាំរបស់ខ្លួន។
ដោយឡែកសហគមន៍ខ្មែរនៅតាមបណ្ដារដ្ឋជាច្រើននៅសហរដ្ឋអាមេរិក នឹងមានការរៀបចំធ្វើបាតុកម្មនៅថ្ងៃអាទិត្យ ទី១០ ខែកញ្ញា នៅរដ្ឋវ៉ាស៊ីនតុន (Washington State) និងរដ្ឋកាលីហ្វ័រញ៉ា (California)។
ជំនួយការអង្គការសម្ព័ន្ធមិត្តខ្មែរ-អាមេរិកាំង នៅរដ្ឋកាលីហ្វ័រញ៉ា អ្នកស្រី ឃី វណ្ណា ឲ្យដឹងថា ពលរដ្ឋខ្មែរជាច្រើនរស់នៅទីក្រុងឡុងប៊ិច (Long Beach) នឹងចូលរួមច្រើនកុះករដើម្បីជំរុញឲ្យរដ្ឋាភិបាលសហរដ្ឋអាមេរិក ចាប់អារម្មណ៍ខ្លាំងទៅលើការរំលោភអំណាចរបស់លោកនាយករដ្ឋមន្ត្រី ហ៊ុន សែន៖ «យើងធ្វើបាតុកម្មនេះ គឺដើម្បីប្រឆាំងលោក ហ៊ុន សែន ដែលចាប់លោកប្រធាន កឹម សុខា និងសុំឲ្យរដ្ឋាភិបាលអាមេរិក ជួយដាក់គំនាបឲ្យដោះលែងលោក កឹម សុខា ពីព្រោះគាត់មិនមែនអ្នកក្បត់ជាតិទេ គាត់អ្នកស្នេហាជាតិ និងអ្នកប្រជាធិបតេយ្យ។ មនុស្សដែលចូលរួម យើងសុំច្បាប់គេអ្នកចូលរួម ប្រហែលជា ១៥០ ទៅ ២០០នាក់ ប៉ុន្តែមនុស្សអាចទៅច្រើនលើសនេះ»។
ប្រធានអង្គការសម្ព័ន្ធមិត្តខ្មែរ-អាមេរិកាំង លោក ទូច វិបុល បានឲ្យដឹងថា សហគមន៍ខ្មែរនៅក្នុងរដ្ឋមួយចំនួនរួមមានវីជីនៀ (Virginia) ម៉ារីលែន (Maryland) រដ្ឋថេនឺស៊ី (Tennessee) រដ្ឋផេនស៊ីលវីនៀ (Pennsylvania) ជាដើម នឹងគ្រោងមកជួបជុំគ្នាតវ៉ានៅថ្ងៃសុក្រ ទី១៥ ខែកញ្ញា នៅខាងមុខក្រសួងការបរទេសសហរដ្ឋអាមេរិក នៅក្នុងរដ្ឋធានីវ៉ាស៊ីនតុន។ លោក ទូច វិបុល ក៏អំពាវនាវសុំឲ្យពលរដ្ឋខ្មែរនៅក្រៅប្រទេសទាំងអស់ ចូលរួមឲ្យបានច្រើនកុះករនៅតាមបណ្ដារដ្ឋរបស់ខ្លួនដើម្បីទាមទាររកយុត្តិធម៌ជូនអ្នកប្រយុទ្ធ ដើម្បីសេរីភាព គឺលោក សមរ ង្ស៊ី អតីតប្រធានគណបក្សសង្គ្រោះជាតិ លោក កឹម សុខា និងអ្នកទោសនយោបាយដទៃទៀត៕
ប្រភព៖ RFA Khmer
No comments:
Post a Comment