 |
| សិស្សចូលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅថ្ងៃទី១ នាមណ្ឌលព្រះស៊ីសុវត្ថិ កាលពីព្រឹកថ្ងៃទី២៤ ខែសីហា ឆ្នាំ២០១៥។Photo: RFA |
គោលការណ៍ ៤ចំណុចដែលក្រសួងបន្តរក្សាដើម្បីពង្រឹងវិស័យអប់រំនៅកម្ពុជា សម្រាប់ការប្រឡងសញ្ញាបត្របាក់ឌុប ដែលនឹងប្រព្រឹត្តទៅនៅថ្ងៃទី២២ ខែសីហា ខាងមុខនេះ គឺការប្រឡងត្រូវតែឈរលើការគោរពច្បាប់ តម្លាភាព យុត្តិធម៌ និងសុចរិតភាព។
រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួន ណារ៉ុន បានប្រាប់វិទ្យុអាស៊ីសេរី នៅថ្ងៃទី១៨ ខែមិថុនា ថា ក្រសួងនឹងបន្តរឹតបន្តឹងវិន័យប្រឡងឲ្យឲ្យដូចការប្រឡងក្នុងឆ្នាំ ២០១៥ ដែរ ដោយសហការជាមួយអង្គភាពប្រឆាំងអំពើពុករលួយ សមត្ថកិច្ចក្រសួងមហាផ្ទៃ ដើម្បីរក្សាសន្តិសុខ និងសណ្ដាប់ធ្នាប់ ព្រមទាំងបើកឱកាសឲ្យអង្គការសង្គមស៊ីវិល និងស្ថាប័នពាក់ព័ន្ធចូលរួមសង្កេតការណ៍។
រដ្ឋមន្ត្រីក្រសួងអប់រំ យុវជន និងកីឡា រូបនេះលើកឡើងទៀតថា ដើម្បីឲ្យសិស្សបានត្រៀមខ្លួនជាមុន ក្រសួងបានបញ្ចូលមេរៀនសង្ខេប ទាំងទ្រឹស្ដី ទាំងលំហាត់ ក្នុងគេហទំព័ររបស់ក្រសួង ដើម្បីឲ្យសិស្សសិក្សាស្វែងយល់ដោយខ្លួនឯង។ លោកបានឲ្យដឹងទៀតថា ប៉ុន្មានខែចុងក្រោយនេះ ក្រសួងបានបញ្ជូនគ្រូទៅបង្រៀនគួរបន្ថែមទៅលើមុខវិជ្ជាគណិតវិទ្យា ជីវវិទ្យា គីមីវិទ្យា និងរូបវិទ្យា ដល់សិស្សទាំងនៅរាជធានី និងតាមបណ្ដាខេត្ត។ លោកបានអំពាវនាវដល់សិស្សដែលត្រៀមប្រឡងបាក់ឌុបទាំងអស់ ត្រូវខិតខំរៀនសូត្រ ព្រោះក្រសួងនឹងឲ្យធ្លាក់ជាស្វ័យប្រវត្តិចំពោះបេក្ខជនណាដែលមិន គោរពច្បាប់ និងនីតិវិធីប្រឡង។
កាលពីពេលថ្មីៗនេះ សេចក្ដីជូនដំណឹងរបស់អង្គភាពប្រឆាំងអំពើពុករលួយ ស្ដីពីការងារសង្កេតការណ៍ការប្រឡងបាក់ឌុបឆ្នាំ២០១៦ នេះដែរ អង្គភាពនេះក៏បានអំពាវនាវឲ្យអ្នកស្ម័គ្រចិត្តជាសង្គមស៊ីវិល និងបុគ្គលឯកជននានា ធ្វើជាអ្នកសង្កេតការណ៍ប្រឡងបាក់ឌុប ដើម្បីបង្កភាពងាយស្រួលដល់ក្រសួងអប់រំ និងរឹតបន្តឹងគុណភាពអប់រំនៅកម្ពុជា កាន់តែប្រសើរឡើង។
ពាក់ព័ន្ធនឹងការរឹតបន្តឹងនេះ នាយកអង្គការសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក ហៅកាត់ថា អានសា (ANSA) លោក សន ជ័យ មានប្រសាសន៍ថា បានសាទរលើការបន្តរក្សារឹតបន្តឹងការប្រឡងនេះ។ ជាងនេះ លោកថា ស្ថាប័នលោកនឹងចុះឈ្មោះសង្កេតការណ៍ជាមួយអង្គភាពប្រឆាំងអំពើពុក រលួយ ដើម្បីត្រៀមដាក់អ្នកសង្កេតការណ៍ប្រឡងបាក់ឌុប តាមមណ្ឌលប្រឡងនៅភ្នំពេញ និងខេត្តកំពង់ចាម ប្រមាណជិត ១០០នាក់។ ដូច្នេះលោកសង្ឃឹមថា ការចូលរួមសង្កេតការណ៍ ជាចំណែកមួយលើកកម្ពស់គុណភាពប្រឡងកាន់តែប្រសើរ។
ប៉ុន្តែយ៉ាងណា លោក សន ជ័យ បានឲ្យដឹងទៀតថា តាមរយៈការងារដែលពាក់ព័ន្ធលើការអប់រំ និងការចូលរួមសង្កេតការណ៍ប្រឡងកន្លងមកឃើញថា មានគ្រូ និងសិស្សមួយចំនួន នៅតែមិនទាន់យល់ច្បាស់ពីនីតិវិធីប្រឡង បង្កឲ្យមានភាពមិនប្រក្រតីមួយចំនួន។ បញ្ហានេះក៏មានសិស្សនៅតាមបណ្ដាខេត្ត ពិសេសនៅតំបន់ដាច់ស្រយាល នៅតែខ្វះឯកសារ ការផ្សព្វផ្សាយមិនទាន់ទូលាយជុំវិញដំណើរការប្រឡងនៅឡើយ ដែលទាមទារឲ្យក្រសួងយកចិត្តទុកដាក់៖ «យើងមើល ទៅឥរិយាបថរបស់បេក្ខជន នៅតែមានដាក់សំណៅឯកសារ។ ខ្ញុំចង់ឃើញក្រសួងរឹតបន្តឹងកុំឲ្យមានភាពរអាក់រអួលដូចមុន ធ្វើយ៉ាងណាឲ្យប្រសើរជាងមុន។ ដូច្នេះក្រសួងគួរតែរឹតបន្តឹងការប្រឡងនេះជារៀងរហូត កុំឲ្យមានអំពើពុករលួយ ដើម្បីឲ្យការសិក្សាអប់រំទូទៅកាន់តែប្រសើរឡើង។ នេះជាអ្វីដែលក្រសួងត្រូវតែបន្តធ្វើ»។
ក្រសួងអប់រំ យុវជន និងកីឡា ឲ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំនេះ មានបេក្ខជនជាង ៨ម៉ឺននាក់ និងមានមណ្ឌលប្រឡងចំនួន១៥០។ ប៉ុន្តែយ៉ាងណា រដ្ឋមន្ត្រីក្រសួងអប់រំ លោក ហង់ ជួន ណារ៉ុន មិនទាន់បានបញ្ជាក់ពីការចំណាយថវិកាជាក់លាក់ និងចំនួនអ្នកសង្កេតការណ៍ចំនួនប៉ុន្មាននាក់ ដើម្បីអនុវត្តការងាររឹតបន្តឹងសម្រាប់ដំណើរការប្រឡងនេះនៅឡើយ៕
2016-06-18 ដោយ អ៊ុំ រង្សី
No comments:
Post a Comment