នាវាដឹកយន្តហោះចម្បាំង USS Gerald R. Ford (CVN-78) របស់អាមេរិក
ដែលជាប្រភេទនាវាថ្មីបំផុត ទើបនឹងបង្កើតឡើងក្នុងសតវត្សទី២១នេះ
កំពុងតែជួបបញ្ហាបច្ចេកទេស ខណៈដែលវាត្រូវបានពន្យារពេល
ដើម្បីប្រកាសដាក់ឲ្យដំណើរការ អស់រយៈពេល២ឆ្នាំរួចមកហើយ
ទាំងដែលថ្លៃចំណាយក្នុងការសង់នាវាដ៏មហិមានេះ
មានសរុប១៣ពាន់លានដុល្លារអាមេរិក ។
USS Gerald R. Ford ត្រូវគេរំពឹងទុកថា
អាចដាក់ឲ្យបម្រើការនាខែកញ្ញា ឆ្នាំ២០១៤បាន
តែដោយសារមានបញ្ហាបច្ចេកទេសខ្លះ
ធ្វើឲ្យក្រុមអ្នកសាកល្បងអាវុធថ្មីនៃមន្ទីរបញ្ចកោណបញ្ជាក់ថា
នាវាចម្បាំងថ្មីនេះ មិនទាន់មានសមត្ថភាពការពារខ្លួននៅឡើយទេ
ដោយកង្វះបច្ចេកទេសនៅមាន៤ចំណុចធំៗ ។
កំពូលនាវាចម្បាំងដែលថ្លៃជាងគេក្នុងប្រវត្តិសាស្ត្រនេះ
ជួបប្រទះបញ្ហាដូចជា ការបញ្ចេញ និងទទួលយន្តហោះចម្បាំង
ការបម្លាស់ទីអាវុធលើនាវា ការគ្រប់គ្រងដែនអាកាស
និងអសមត្ថភាពក្នុងការការពារខ្លួន ដោយលោក Michael Gilmore
ជាប្រធាននាយកដ្ឋាននៃការធ្វើតេស្ត
និងវាយតម្លៃប្រតិបត្តិការរបស់ក្រសួងការពារជាតិ បានបញ្ជាក់ថា "លុះត្រាតែបញ្ហាទាំងនេះត្រូវបានដោះស្រាយ បើមិនដូច្នោះទេ វានឹងកម្រិតសមត្ថភាពប្រយុទ្ធរបស់នាវា CVN-78" ។
មកទល់ពេលនេះ ដំណើរការសាងសង់នៃនាវា USS Gerald R. Ford
ប្រព្រឹត្តទៅបាន៩៨% និងសាកល្បងកម្មវិធីជាច្រើនសម្រេចបាន៨៨%ហើយ
ដោយគេរំពឹងថា វាអាចនឹងចូលបម្រើកងទ័ពនាឆ្នាំ២០១៧បាន
ដោយនាវាចម្បាំងថ្មីនេះ
ជានាវាចម្បាំងដែលបានបំពាក់បច្ចេកវិទ្យាទំនើបបំផុត
និងជាប្រភេទនាវាថ្មីបំផុត សម្រាប់ពិភពលោកទាំងមូល ។
នាវាចម្បាំងបន្ទាប់ដែលកំពុងស្ថិតក្នុងការសាងសង់នៅឡើយនោះ គឺនាវា
USS John F. Kennedy (CVN 79) ដែលទើបតែសម្រេចបាន១៨%ប៉ុណ្ណោះ
គិតត្រឹមខែមីនានេះ តែគេគ្រោងនឹងដាក់ឲ្យបម្រើការនៅឆ្នាំ២០២០
ចំណែកឯនាវា USS Enterprise (CVN 80) នឹងចាប់ផ្ដើមសាងសង់នៅឆ្នាំ២០១៨
ជានាវាប្រភេទ Ford-class carrier ទី៣ ។
គួរបញ្ជាក់ថា កងទ័ពជើងទឹកអាមេរិក
បានត្រៀមកញ្ចប់ថវិកាចំនួន៨១.៣ពាន់លានដុល្លារ
ដើម្បីសាងសង់នាវាចម្បាំងថ្មី៣៨គ្រឿង
ក្នុងបំណងជំនួសនាវាមុជទឹកបាញ់មីស៊ីលអន្តរទ្វីបមួយគ្រឿង
នាវាមុជទឹកកម្រិត Virginia-class ៩គ្រឿង នាវាពិឃាត១០គ្រឿង
និងនាវាតូចៗផ្សេងទៀត ។
សូមបញ្ជាក់ថា USS Gerald R. Ford មានប្រវែង៣៣២ម៉ែត្រ
និងទម្ងន់១០ម៉ឺនតោន ជានាវាចម្បាំងធំបំផុតក្នុងលោក
ហើយដើរដោយរ៉េអាក់ទ័រថាមពលនុយក្លេអ៊ែរ២គ្រាប់
ប្រើខ្សែភ្លើងដល់ទៅ១០លានខ្សែ
ដោយវាអាចផ្ទុកមនុស្សបានចំនួន៤៥៣៩នាក់ និងយន្តហោះចម្បាំង៧៥គ្រឿង
៕ (CNN)
 |
 |
 |
 |
ប្រភព៖ KNN
No comments:
Post a Comment