 |
| តំណាងរាស្ត្រគណបក្សសង្គ្រោះជាតិ លោក យ៉ែម បុញ្ញឫទ្ធិ ផ្ដល់សម្ភាសន៍ដល់អ្នកកាសែតក្រោយបិទបញ្ចប់កិច្ចប្រជុំគណៈកម្មាធិការអចិន្ត្រៃយ៍រដ្ឋសភា កាលពីព្រឹកថ្ងៃទី១៨ ខែវិច្ឆិកា ឆ្នាំ២០១៦។ RFA/Morm Moniroth |
មន្ត្រីនាំពាក្យគណបក្សប្រឆាំងយល់ឃើញថា មូលហេតុចម្បងដែលជំរុញឲ្យគណបក្សសំឡេងភាគតិចនៅក្នុងរដ្ឋសភាមូលមាត់គ្នាថា នឹងចូលអង្គុយប្រជុំក្នុងសម័យសភាពេញអង្គ ដែលគ្រោងនឹងចាប់ផ្ដើមប្រមាណ ៤ថ្ងៃខាងមុខទៀតនេះ ព្រោះជាដំណាក់កាលដ៏ចាំបាច់ទាក់ទិននឹងថវិកាជាតិ។
ថ្លែងក្រោយកិច្ចប្រជុំគណៈកម្មាធិការអចិន្ត្រៃយ៍នៃរដ្ឋសភាបានបិទបញ្ចប់ ដែលប្រើពេលដ៏ខ្លីកាលពីព្រឹកថ្ងៃទី១៨ ខែវិច្ឆិកា លោក យ៉ែម បុញ្ញឫទ្ធិ បញ្ជាក់ថា សម័យប្រជុំសភាពេញអង្គនៅថ្ងៃទី២២ វិច្ឆិកា ដែលរដ្ឋសភាគ្រោងនឹងអនុម័ត និងផ្ដល់សច្ចាប័នលើរបៀបវារៈមួយចំនួន ក្នុងនោះរបៀបវារៈដ៏សំខាន់មួយទៀត គឺការអនុវត្តច្បាប់គ្រប់គ្រងថវិកាជាតិឆ្នាំ២០១៧ ព្រមទាំងទូទាត់ថវិកាទូទៅរបស់រដ្ឋ សម្រាប់ការគ្របគ្រងឆ្នាំ២០១៥។
លោកបន្តថា ដោយសារតែរដ្ឋសភាត្រូវអនុម័តទៅលើច្បាប់ទាំងនេះហើយ ដែលចាំបាច់ណាស់គណបក្សប្រឆាំងត្រូវតែចូលរួមពិគ្រោះយោបល់ និងពិភាក្សាដេញដោល ព្រោះជាប់ទាក់ទិនផលប្រយោជន៍ជាតិ៖ «រឿងដែលសំខាន់គឺច្បាប់ថវិកាជាតិសម្រាប់ប្រទេសមួយៗ គឺជាច្បាប់ដែលសំខាន់បំផុតពាក់ព័ន្ធជាមួយប្រជាពលរដ្ឋ។ ដូច្នេះគណបក្សសង្គ្រោះជាតិ យល់ឃើញថា ជាច្បាប់មួយដ៏សំខាន់ ហើយខាងសំឡេងភាគតិច នឹងចូលរួមដើម្បីពិភាក្សា និងផ្ដល់មតិយោបល់»។
ថវិកាជាតិឆ្នាំ២០១៧ ដែលគណៈរដ្ឋមន្ត្រីអនុម័តនៅក្នុងកិច្ចប្រជុំរបស់ខ្លួន កាលពីថ្ងៃទី២១ ខែតុលា និងរដ្ឋសភាគ្រោងនឹងអនុម័តនៅថ្ងៃទី២២ ខែវិច្ឆិកា នោះ គឺមានទំហំទឹកប្រាក់ប្រមាណជិត ៥ពាន់លានដុល្លារអាមេរិក។ ចំនួននេះមានការកើនឡើង បើធៀបទៅនឹងការចំណាយថវិកាជាតិឆ្នាំ២០១៦ ដែលមានតែជិត ៤ពាន់លានដុល្លារអាមេរិក។ សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងថវិកាជាតិឆ្នាំ២០១៧ នេះ មាន ៦ជំពូក និង ១៥មាត្រា។
 |
| អ្នកនាំពាក្យរបស់រដ្ឋសភា លោក ឡេង ប៉េងឡុង ផ្ដល់សម្ភាសន៍ដល់អ្នកកាសែតក្រោយបិទបញ្ចប់កិច្ចប្រជុំគណៈកម្មាធិការអចិន្ត្រៃយ៍រដ្ឋសភា កាលពីព្រឹកថ្ងៃទី១៨ ខែវិច្ឆិកា ឆ្នាំ២០១៦។ RFA/Morm Moniroth |
លោកបន្តថា របៀបវារៈដែលបានដាក់បញ្ចូលបន្ថែមទៀតនេះ ក៏នឹងស្នើឲ្យរដ្ឋសភាពេញអង្គទាំងមូលផ្ដល់សច្ចាប័ន និងអនុម័តលើរបៀបវារៈដែលមានស្រាប់៖ «ដូច្នេះហើយក្នុងរបៀបវារៈហ្នឹងមាន ៣កិច្ចព្រមព្រៀងស្ដីពីការប្រែប្រួលធាតុអាកាស។ ២ សេចក្ដីព្រាងច្បាប់ស្ដីពីការគ្រប់គ្រងហិរញ្ញវត្ថុសម្រាប់ឆ្នាំ២០១៧ ហើយនិងសម្រាប់របៀបវារៈ ទី៣ សេចក្ដីព្រាងច្បាប់ស្ដីពីការទូទាត់ថវិការបស់រដ្ឋសម្រាប់ការគ្រប់គ្រងឆ្នាំ២០១៥»។
លោក សន ជ័យ នាយកប្រតិបត្តិនៃសម្ព័ន្ធគណនេយ្យសង្គមកម្ពុជា យល់ឃើញថា ប្រសិនបើការពិគ្រោះយោបល់លើសេចក្ដីព្រាងច្បាប់នេះ មិនត្រូវបានរដ្ឋសភាទទួលយកការរិះគន់ដាក់បញ្ចូលក្នុងភាពចន្លោះប្រហោងរបស់បក្សប្រឆាំងទេ នោះបានន័យថា ការចូលរួមប្រជុំសភារបស់ក្រុមសមាជិកសំឡេងភាគតិចនេះ គ្រាន់តែជាការចូលទៅដើម្បីបង្គ្រប់កិច្ចប៉ុណ្ណោះ៖ «បើសិនជាមានពេលវេលាច្រើនក្នុងការជជែកគ្នាច្រើន ហើយសភាទុកពេលវេលាឲ្យបានគ្រប់គ្រាន់សម្រាប់ការជជែកដេញដោល ហើយមតិយោបល់ពីគណបក្សប្រឆាំង និងអង្គការសង្គមស៊ីវិលដាក់បញ្ចូល ហើយបើមានការត្រួតពិនិត្យ និងកែសម្រួលឡើងខ្លះទៅ ខ្ញុំថា វាក៏នឹងមានប្រយោជន៍ខ្លះដែរ»។
ទាក់ទងការចូលរួមប្រជុំសភាពេញអង្គដែលនៅសល់ពេលប្រមាណ ៤ថ្ងៃទៀតនេះ ក្រុមអ្នកវិភាគនយោបាយកំពុងអុតមើលរបៀបវារៈដ៏សំខាន់មួយទៀត គឺរង់ចាំមើលតើថា លោក កឹម សុខា អាចនឹងមានវត្តមាននៅក្នុងសម័យប្រជុំសភាពេញអង្គជាមួយសមាជិកសភាដទៃទៀតដែរ ឬយ៉ាងណា?
បញ្ហានេះមន្ត្រីដែលស្និតនឹងប្រធានស្ដីទីគណបក្សប្រឆាំង លោក មុត ចន្ថា បង្ហោះនៅក្នុងបណ្ដាញសង្គមនៅថ្ងៃទី១៨ ខែវិច្ឆិកា ថា លោក កឹម សុខា មិនទាន់ប្រាកដថា នឹងត្រូវចូលរួមប្រជុំសភានៅឡើយទេ ប៉ុន្តែប្រធានស្ដីទីរូបនេះតែងបង្ហាញឆន្ទៈជានិច្ចក្នុងការចូលប្រជុំ។ ក្រៅពីនេះវិញ លោក យឹម សុវណ្ណ មន្ត្រីជាន់ខ្ពស់គណបក្សប្រឆាំងឲ្យដឹងដែរថា សភាពការណ៍នយោបាយនៅពេលនេះ នៅទ្រឹងពុំមានការប្រែប្រួលអ្វីនោះទេ នៅមុនថ្ងៃប្រជុំសភាពពេញអង្គចាប់ផ្ដើមនេះ៕
ដោយ ម៉ម មុនីរតន៍ 2016-11-18
No comments:
Post a Comment