 |
| តើរបបប្រជាធិបតេយ្យបែបប្រធានាធិបតីនិយម បែបសភានិយម និងបែបចម្រុះ មានលក្ខណៈយ៉ាងណា? |
ក្នុងរបបប្រធានាធិបតីនិយម ពលរដ្ឋបោះឆ្នោតថ្នាក់ជាតិពីរលើកផ្សេងពីគ្នា។ មួយគឺបោះឆ្នោតរើសសមាជិកសភាឲ្យបង្កើតជាក្រុមនីតិបញ្ញត្តិ សម្រាប់តាក់តែងច្បាប់។ មួយទៀតគឺបោះឆ្នោតរើសប្រធានាធិបតី ឲ្យបង្កើតរដ្ឋាភិបាល និងធ្វើជាប្រមុខរដ្ឋាភិបាល សម្រាប់ប្រតិបត្តិតាមច្បាប់របស់សភា។ ប្រធានាធិបតីជាប្រមុខរដ្ឋាភិបាលផង ជាតំណាងប្រទេសជាតិ។ របបនេះគ្មាននាយករដ្ឋមន្ត្រីទេ។ ក្នុងរបបនេះ អំណាចនីតិបញ្ញត្តិ និងអំណាចនីតិប្រតិបត្តិនៅដាច់ពីគ្នា។
របបប្រជាធិបតេយ្យបែបសភានិយម (ដូចជានៅប្រទេសអង់គ្លេស និងអូស្ត្រាលី)
ក្នុងរបបសភានិយម ពលរដ្ឋបោះឆ្នោត ថ្នាក់ជាតិតែមួយលើក ដើម្បីជ្រើសរើសសមាជិកសភា។ ហើយសមាជិកសភាក្នុងបក្សឈ្នះ ជ្រើសរើសនាយករដ្ឋមន្ត្រីឲ្យបង្កើតរដ្ឋាភិបាល និងធ្វើជាប្រមុខរដ្ឋាភិបាល។ របបនេះគ្មានប្រធានាធិបតីទេ។ ក្នុងរបបនេះ អំណាចនីតិប្រតិបត្តិ ជាផ្នែកមួយនៃអំណាចនីតិបញ្ញត្តិ។ អំណាចពីរមិននៅដាច់ដោយឡែកពីគ្នា ដូចរបបប្រធានាធិបតីនិយមទេ។
របបប្រជាធិបតេយ្យបែបចម្រុះ (គឺសភានិយមពាក់កណ្ដាល ប្រធានាធិបតីពាក់កណ្ដាល ដូចប្រទេសបារាំង)
ក្នុងរបបប្រជាធិបតេយ្យបែបចម្រុះដូចជានៅប្រទេសបារាំងជាដើម ពលរដ្ឋបោះឆ្នោតថ្នាក់ជាតិពីរលើក។ មួយគឺបោះឆ្នោតជ្រើសរើសសមាជិកសភា ហើយសមាជិកសភាបក្សឈ្នះ ជ្រើសរើសនាយករដ្ឋមន្ត្រី ឲ្យបង្កើតរដ្ឋាភិបាល និងធ្វើជាប្រមុខរដ្ឋាភិបាល។ មួយទៀតពលរដ្ឋបោះឆ្នោតរើសប្រធានាធិបតី ឲ្យតំណាងប្រទេសជាតិទាំងមូល។ របបនេះមាននាយករដ្ឋមន្ត្រីផង មានប្រធានាធិបតីផង៕
ដកស្រង់ចេញពីសៀវភៅសំណួរ និងចម្លើយវប្បធម៌ និងអរិយធម៌ខ្មែរ (និពន្ធ និងរៀបរៀងដោយ លោក លឹម ហ៊ិន)
ប្រភព៖ Khmer Keep
No comments:
Post a Comment