 |
| ការដង្ហែក្បួនឃោសនាបោះឆ្នោតក្រុមប្រឹក្សាឃុំ-សង្កាត់របស់គណបក្សខ្មែររួបរួមជាតិ នៅថ្ងៃដំបូង ថ្ងៃទី២០ ខែឧសភា ឆ្នាំ២០១៧ នារាជធានីភ្នំពេញ។ RFA/Tha Kitya
ប្រធានគណៈកម្មការរៀបចំការបោះឆ្នោតរាជធានីភ្នំពេញ ប្រាប់ថា គណបក្សដែលដាក់បេក្ខជនឈរឈ្មោះមិនបានគ្រប់សង្កាត់ទាំង ១០៥ នឹងទទួលបានឱកាសក្នុងការហែក្បួនជាទ្រង់ទ្រាយធំដូចគណបក្សដាក់បេក្ខជនឈរឈ្មោះគ្រប់សង្កាត់ដែរ ប៉ុន្តែការហែក្បួនជាទ្រង់ទ្រាយធំរបស់បក្សទាំងនោះ ត្រូវហែជាលក្ខណៈស្បែកខ្លា។
មន្ត្រីជាន់ខ្ពស់នៃគណៈកម្មការរៀបចំការបោះឆ្នោតរាជធានីឲ្យដឹងនៅថ្ងៃទី២៣ ខែឧសភា ថា គ្រប់គណបក្សនយោបាយទាំងអស់មានសិទ្ធិរៀបចំឃោសនាជាទ្រង់ទ្រាយធំដូចគ្នា គឺស្របតាមនីតិវិធី គ.ជ.ប បានកំណត់។
ប្រធានគណៈកម្មការរៀបចំការបោះឆ្នោតរាជធានី លោក មាស ឆព្វណ្ណ បញ្ជាក់ថា ក្នុងក្បួនធំគ្រប់គណបក្សទាំងនោះ អាចហែបានដោយប្រើឧបករណ៍បំពងសំឡេងដោយសេរី និងស្រែកឃោសនាពីគោលនយោបាយបក្សខ្លួនបានស្រេចចិត្តសម្រាប់ការហែនៅក្នុងសង្កាត់ ដែលបានដាក់បេក្ខជនឈរឈ្មោះ ប៉ុន្តែនៅពេលដែលឆ្លងសង្កាត់ ចូលទៅសង្កាត់មួយទៀត ចំពោះគណបក្សណាមិនបានដាក់បេក្ខជនឈរឈ្មោះទេ គណបក្សនោះ ត្រូវបិទ
ឧបករណ៍បំពងសំឡេង ហើយត្រូវជិះឡាន ឬម៉ូតូឆ្លងកាត់ដោយស្ងាត់ស្ងៀម រហូតអាចធ្វើសកម្មភាពឃោសនាឡើងវិញបាននៅសង្កាត់ដែលខ្លួនបានដាក់បេក្ខជនឈរឈ្មោះប្រកួតប្រជែង។
លោក មាស ឆព្វណ្ណ បន្ថែមថា ការធ្វើដូច្នេះ ដើម្បីសម្រួលដល់គណបក្សដែលដាក់បេក្ខជនមិនបានគ្រប់សង្កាត់ អាចមានឱកាសបានរៀបចំហែក្បួនឃោសនាជាទ្រង់ទ្រាយធំ និងឆ្លងសង្កាត់ ដូចគណបក្សមានបេក្ខជនឈរឈ្មោះគ្រប់ឃុំ-សង្កាត់ដែរ៖ «»។
សកម្មភាពឃោសនាបោះឆ្នោត ថ្ងៃទី៤ នៅទីក្រុងភ្នំពេញ មានស្ថានភាពស្ងប់ស្ងាត់ខ្លាំង បើធៀបនឹងការឃោសនាកាលពី ២ថ្ងៃបើកឆាកដំបូងនៃយុទ្ធនាការឃោសនា។ តែទោះជាយ៉ាងណា ប្រធានគណៈកម្មការរៀបចំការបោះឆ្នោតរាជធានីភ្នំពេញ វាយតម្លៃថា ការហែក្បួននៅភ្នំពេញ មានលក្ខណៈល្អជាងនៅតាមបណ្ដាខេត្ត ព្រោះមកដល់ថ្ងៃទី៤ នៃយុទ្ធនាការហែក្បួននេះ នៅមិនទាន់ទទួលបានពាក្យបណ្ដឹងមួយនៅឡើយទេ ខណៈដែល គ.ជ.ប ទទួលបានពាក្យបណ្ដឹងនៅតាមខេត្តជាង ២០បណ្ដឹងហើយ។
លោក មាស ឆព្វណ្ណ ថា មានតែគណបក្ស២ទេ គឺគណបក្សខ្មែររួបរួមជាតិ និងគណបក្សសម្ព័ន្ធដើម្បីប្រជាធិបតេយ្យ ដែលបានចូលរួមប្រជុំ នឹងសន្យាជូនដំណឹងដល់អាជ្ញាធរដើម្បីហែក្បួនជាលក្ខណៈស្បែកខ្លានៅភ្នំពេញ។ ឯគណបក្សហ៊្វុនស៊ិនប៉ិច និងគណបក្សសំបុកឃ្មុំសង្គមប្រជាធិបតេយ្យ មិនបានចូលរួមប្រជុំទេ។ គណៈកម្មការនឹងជូនដំណឹងទៅពេលក្រោយ។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (NICFEC) លោក សំ គន្ធាមី មើលឃើញថា ការសម្រួលរបស់គណៈកម្មការរៀបចំការបោះឆ្នោតនៅរាជធានីជាការល្អ ប្រសិនបើអាចធ្វើទៅបានមែន។ ឯការហែក្បួននៅភ្នំពេញ មិនទាន់មានពាក្យបណ្ដឹង លោក សំ គន្ធាមី យល់ថា ការហែក្បួនឃោសនានៅអាណត្តិនេះ លោកឃើញមានលក្ខណៈល្អ គ្មានការប៉ះទង្គិច និងចេះយោគយល់គ្នាជាងអាណត្តិមុនៗ៖ «»។
គណបក្សចំនួន៦ ដែលបានដាក់បេក្ខជនឈរឈ្មោះក្រុមប្រឹក្សាសង្កាត់ក្នុងរាជធានីភ្នំពេញនោះ មានតែពីរគណបក្សទេដែលមានបេក្ខជនឈរឈ្មោះគ្រប់សង្កាត់ គឺគណបក្សសង្គ្រោះជាតិ និងគណបក្សប្រជាជនកម្ពុជា។ ក្រៅពីគណបក្សទាំងពីរនេះ មានគណបក្សសម្ព័ន្ធដើម្បីប្រជាធិបតេយ្យ ដែលបានហែក្បួនឃោសនាជាទ្រាយធំនៅរាជធានីភ្នំពេញ កាលពីថ្ងៃទី២១ ខែឧសភា។ លោក មាស ឆព្វណ្ណ បញ្ជាក់ថា តំណាងគណបក្សសម្ព័ន្ធដើម្បីប្រជាធិបតេយ្យបានសុំទោសគណៈកម្មការរៀបចំការបោះឆ្នោតរាជធានីភ្នំពេញ រួចហើយ ចំពោះការហែក្បួនឆ្លងសង្កាត់ដោយមិនបានជូនដំណឹងទៅគណៈកម្មការរៀបចំការបោះឆ្នោតរាជធានីជាមុន៕
ប្រភព: RFA Khmer
|
Wednesday, May 24, 2017
"គណបក្ស៤នឹងទទួលបានឱកាសហែក្បួនជាទ្រង់ទ្រាយធំនៅភ្នំពេញជាលក្ខណៈស្បែកខ្លា"
Subscribe to:
Post Comments (Atom)
No comments:
Post a Comment