 |
| លោក សម រង្ស៊ី ចូលរួមកម្មវិធីទូរទស្សន៍អាស៊ីសេរី កាលពីថ្ងៃទី១៥ ខែមិថុនា ឆ្នាំ២០១៦។ RFA |
មន្ត្រីជាន់ខ្ពស់នៃគណៈកម្មាធិការជាតិរៀបចំការបោះឆ្នោត (គ.ជ.ប) ឲ្យដឹងថា គ.ជ.ប នឹងប្រជុំពិនិត្យមើលពីសារនយោបាយ និងរូបភាពរបស់លោក សម រង្ស៊ី អតីតប្រធានគណបក្សសង្គ្រោះជាតិ ដែលសព្វថ្ងៃគណបក្សសង្គ្រោះជាតិ កំពុងយកមកប្រើប្រាស់ក្នុងការឃោសនា។ ករណីនេះ គ.ជ.ប អះអាងថា ប្រសិនបើមានគណបក្សនយោបាយណាប្ដឹងជំទាស់ទើប គ.ជ.ប បើកការស៊ើបអង្កេត។ ប៉ុន្តែគណបក្សសង្គ្រោះជាតិ និងអង្គការសង្គមស៊ីវិល ដែលធ្វើការងារទាក់ទងការបោះឆ្នោតរកមិនឃើញថា មានច្បាប់ណាមួយហាមមិនឲ្យយកសារ ឬរូបភាពរបស់ទណ្ឌិត ឬអតីតប្រធានគណបក្សនយោបាយមិនឲ្យយកមកឃោសនានោះទេ។
អ្នកនាំពាក្យ គ.ជ.ប លោក ហង្ស ពុទ្ធា អះអាងថា គ.ជ.ប នឹងប្រជុំពិនិត្យមើលពាក្យបណ្ដឹងគណបក្សនយោបាយដែលប្ដឹងប្រឆាំងមិនឲ្យគណបក្សសង្គ្រោះជាតិ យកសារ និងរូបថតរបស់លោក សម រង្ស៊ី ប្រើប្រាស់ក្នុងការឃោសនា។ លោកបញ្ជាក់ថា កិច្ចប្រជុំនោះធ្វើឡើងដោយសមាជិកទាំង៩ របស់ គ.ជ.ប ហើយការសម្រេចយ៉ាងណា ក៏លោកមិនទាន់អាចដឹងមុនបានដែរ៖ «បើមានបណ្ដឹង គ.ជ.ប ពិនិត្យសិន បានអង្គប្រជុំសម្រេចយ៉ាងណា ហើយអង្គប្រជុំជាអង្គប្រជុំចម្រុះ»។
យ៉ាងណាក៏ដោយចុះ លោកថា ប្រសិនបើគ្មានគណបក្សនយោបាយប្ដឹងទាស់ គ.ជ.ប មិនមានចំណាត់ការ ឬក៏កោះប្រជុំលើកយកករណីនេះមកប្រជុំ
ពិភាក្សានោះដែរ។ លោកបន្ថែមថា មកទល់ពេលនេះ មិនទាន់មានបណ្ដឹងណាមួយប្រឆាំងនឹងគណបក្សសង្គ្រោះជាតិ ពីករណីនេះទេ។
ការថ្លែងបែបនេះរបស់អ្នកនាំពាក្យគណៈកម្មាធិការជាតិរៀបចំការបោះឆ្នោត ក្រោយពេល គ.ជ.ប សម្រេចច្រានចោលការផ្សព្វផ្សាយគោលនយោបាយ ឬស្ប៉តឃោសនាបោះឆ្នោតរបស់គណបក្សមួយក្នុងចំណោមបី នៅរសៀលថ្ងៃទី២៣ ខែឧសភា ដែលគណបក្សនេះ បានផ្ញើទៅឲ្យ គ.ជ.ប ពិនិត្យមើលមុននឹងចាក់ផ្សាយតាមប្រព័ន្ធផ្សព្វផ្សាយរបស់រដ្ឋ ដែល គ.ជ.ប ជាអ្នកពិនិត្យមើលខ្លឹមសារនោះ និងជាអ្នកទទួលខុសត្រូវលើការចាក់ផ្សាយ។
ស្ប៉តដែល គ.ជ.ប ហាមនោះ ត្រូវបានលោក ហង្ស ពុទ្ធា ប្រាប់ថា ជាសេចក្ដីអំពាវនាវរបស់លោក សម រង្ស៊ី។ លោកពន្យល់ថា មូលហេតុដែល គ.ជ.ប ហាមមិនឲ្យផ្សាយស្ប៉តនេះ ព្រោះលោក សម រង្ស៊ី ជាទណ្ឌិត ដែលកំពុងរងការចាប់ខ្លួនពីក្រុមសមត្ថកិច្ច ដែលបម្រាមនេះស្ថិតនៅក្នុងច្បាប់បោះឆ្នោត។ លោកបន្តទៀតថា តំណាងមេធាវីរបស់គណបក្សសង្គ្រោះជាតិ ក៏យល់ព្រមតាមការសម្រេចរបស់ គ.ជ.ប ដែរ។
លោក ហង្ស ពុទ្ធា ថា ទោះស្ប៉តនោះត្រូវ គ.ជ.ប ហាមក្តី ប៉ុន្តែគណបក្សសង្គ្រោះជាតិ អាចទៅចាក់ផ្សាយនៅលើប្រព័ន្ធផ្សព្វផ្សាយរបស់ឯកជនហើយគឺជាការទទួលខុសត្រូវរបស់គណបក្សសង្គ្រោះជាតិ តែបើមានគណបក្សនយោបាយណាប្ដឹងជំទាស់ គ.ជ.ប នឹងពិនិត្យមើល។
ដោយឡែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ប្រាប់ថា គណបក្សសង្គ្រោះជាតិ មិនបានយល់ស្របទៅនឹងការហាមឃាត់របស់ គ.ជ.ប ទេ គឺគណបក្សបានមិនឆ្លើយតបចំពោះការហាមឃាត់របស់ គ.ជ.ប។
ទាក់ទងរឿងនេះ ការផ្សាយសារ និងរូបភាពរបស់លោក សម រង្ស៊ី នៅពេលឃោសនាបោះឆ្នោត អ្នកនាំពាក្យគណបក្សសង្គ្រោះជាតិ រូបនេះ ចោទសួរទៅ គ.ជ.ប វិញថា តើការចាក់ផ្សាយសំឡេងលោក សម រង្ស៊ី ខុសទៅនឹងច្បាប់អ្វី? ជាងនេះទៅទៀត លោកទាមទារឲ្យ គ.ជ.ប ពិនិត្យលើខ្លឹមសារនៃសាររបស់លោក សម រង្ស៊ី តើមានចំណុចមានខ្លឹមសារក្បត់ផលប្រយោជន៍ជាតិ ឬទេ៖ «វាអាស្រ័យលើខ្លឹមសារពាក្យពេចន៍របស់គាត់ (លោក សម រង្ស៊ី) បើគាត់មានចេតនាផ្ដល់យោបល់ដល់ផលប្រយោជន៍ តើអ្នកប្ដឹងហ្នឹង ប្ដឹងក្នុងគោលបំណងអី?»។
លោក យឹម សុវណ្ណ បន្តថា គណបក្សសង្គ្រោះជាតិ នៅតែប្រើសារ និងរូបរបស់លោក សម រង្ស៊ី ដើម្បីផ្សព្វផ្សាយក្នុងពេលឃោសនា បើលោក សម រង្ស៊ី មិនប្រឆាំងទាស់។
ចាប់តាំងពីថ្ងៃឃោសនាបោះឆ្នោតកាលពីថ្ងៃទី២០ ខែឧសភា មកទល់ពេលនេះ គេសង្កេតឃើញគណបក្សសង្គ្រោះជាតិ ធ្វើយុទ្ធនាការឃោសនាដោយមានភ្ជាប់សារជាសំឡេង ក៏ដូចជារូបថតរបស់លោក សម រង្ស៊ី។ ខ្លឹមសារទាំងនោះ លោក សម រង្ស៊ី ផ្ដល់គំនិតទាក់ទងនយោបាយ និងការដោះស្រាយបញ្ហាសេដ្ឋកិច្ច។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា ការដែលគណបក្សសង្គ្រោះជាតិ យករូបនឹងសាររបស់លោក សម រង្ស៊ី មកឃោសនា គឺលោកទុកសមត្ថកិច្ច គ.ជ.ប ជាអ្នកពិនិត្យ និងវិនិច្ឆ័យ។ ប៉ុន្តែលោកយល់ថា តាមច្បាប់ លោក សម រង្ស៊ី គ្មានសិទ្ធិមកតទល់ក្នុងឆាកនយោបាយនោះទេ៖ «តាមខ្ញុំយល់ សម រង្ស៊ី គ្មានមុខចូលមកឆាកនយោបាយទៀតទេ ព្រោះខ្លួនឯងបានលាឈប់ពីឆាកនយោបាយរួចហើយ»។
តែទោះយ៉ាងនេះក្តី នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (NICFEC) លោក សំ គន្ធាមី ដែលជាអ្នកធ្វើការទាក់ទងការបោះឆ្នោតមិនយល់ដូច្នេះទេ។ លោកថា តាមច្បាប់បោះឆ្នោត មិនបានហាមមិនឲ្យទណ្ឌិត ឬបុគ្គលមិនមែនសមាជិកគណបក្សនយោបាយ ផ្ញើសារជាសំឡេងគាំទ្រគណបក្សនយោបាយ ឬណែនាំពលរដ្ឋឲ្យទៅគាំទ្រគណបក្សនយោបាយណានោះទេ៖ «ច្បាប់មានចែងមែន ទណ្ឌិតមិនអាចចុះឈ្មោះបោះឆ្នោត មិនអាចទៅឈរឈ្មោះអីបាន ប៉ុន្តែរឿងផ្ញើសារហ្នឹងច្បាប់អត់មាននិយាយទេ»។
លោក សម រង្ស៊ី បានខ្ទាតចេញពីសង្វៀននយោបាយ ក្រោយពីតុលាការបានកាត់ទោសលោកជាច្រើនសំណុំរឿង ផ្ដន្ទាទោសលោកជាបន្តបន្ទាប់។ ទាំងលោក សម រង្ស៊ី និងសហគមន៍ជាតិ និងអន្តរជាតិមួយចំនួន ចាត់ទុកចំណាត់ការរបស់តុលាការប្រឆាំងលោក សម រង្ស៊ី ជារឿងនយោបាយ។
មកដល់ដើមឆ្នាំ២០១៧ នៅពេលដៃគូប្រកួតប្រជែងនយោបាយរបស់លោក គឺលោកនាយករដ្ឋមន្ត្រី ហ៊ុន សែន ដឹកនាំក្រុមតំណាងរាស្ត្ររបស់លោក កែប្រែច្បាប់ស្ដីពីគណបក្សនយោបាយ ចែងហាមមិនឲ្យអ្នកមានទោសធ្វើជាប្រធាន និងអនុប្រធានគណបក្សនយោបាយនោះ លោក សម រង្ស៊ី ក៏បានលាលែងតំណែងពីប្រធានគណបក្សសង្គ្រោះជាតិ៕
ប្រភព: RFA Khmer
No comments:
Post a Comment