 |
| លោក កឹម សុខា ប្រធានគណបក្សសង្គ្រោះជាតិ ថ្លែងទៅកាន់អ្នកគាំទ្រនៅខេត្តកំពង់ឆ្នាំង នៅថ្ងៃទី២៣ ខែឧសភា ឆ្នាំ២០១៧។ RFA/Chin Chetha |
ប្រធានគណបក្សសង្គ្រោះជាតិ លោក កឹម សុខា រំពឹងថា គណបក្សលោកនឹងទទួលបានសំឡេងគាំទ្រ ៦០% ក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤នេះ។ ប៉ុន្តែមន្ត្រីគណបក្សប្រជាជនកម្ពុជា ថ្លែងចំអកថា គណបក្សសង្គ្រោះជាតិ មិនអាចទទួលបានសំឡេងគាំទ្រដូចការរំពឹងទុកនោះទេ ព្រោះកម្លាំងដែលធ្លាប់មានក្នុងការបោះឆ្នោតកាលឆ្នាំ២០១៣ បានបែកខ្ញែកអស់ហើយ។
លោក កឹម សុខា ដើរប្រកាសប្រាប់អ្នកគាំទ្ររបស់ខ្លួននៅតាមបណ្ដាខេត្តក្នុងឱកាសដែលលោកចុះឃោសនារកសំឡេងឆ្នោតថា គណបក្សសង្គ្រោះជាតិ ប្រកាន់ជំហរអហិង្សា និងប្រកួតដោយថ្លៃ
ថ្នូរ។ លោកថា ការប្រកួតប្រជែងលើកនេះ គណបក្សសង្គ្រោះជាតិ នឹងទទួលបានសំឡេងយ៉ាងតិច ៦០% ដោយសំអាងថា ពលរដ្ឋមើលឃើញថា គោលនយោបាយទាំង ៥ចំណុច ដើម្បីអភិវឌ្ឍន៍ឃុំ-សង្កាត់ អាចអនុវត្តបាន។
ក្រោយជួបអ្នកគាំទ្រប្រមាណ ១ពាន់នាក់នៅក្រុងពោធិ៍សាត់ កាលពីថ្ងៃទី២៣ ខែឧសភា លោក កឹម សុខា ប្រាប់អាស៊ីសេរីថា សកម្មភាពឃោសនាជិត ១សប្ដាហ៍ដំបូង គឺមានភាពប្រសើរ ដោយមានកម្លាំងសមត្ថកិច្ចជួយសម្រួលចរាចរណ៍ និងដោះស្រាយបញ្ហាប្រឈមតិចតួចទាន់ពេល។ លោកថា បើស្ថានភាពល្អប្រសើរដូចនេះ បន្តរហូតដល់ថ្ងៃបោះឆ្នោត នឹងពុំមានការតវ៉ាអ្វីកើតឡើងទេ នៅក្រោយការបោះឆ្នោត៖ «ដូចខ្ញុំបញ្ជាក់អ៊ីចឹង ឥឡូវនេះប្រសើរជាងមុន រហូតដល់ថ្ងៃនេះអត់មានបញ្ហាធំដុំទេ។ ដូច្នេះហើយបានខ្ញុំសូមអំពាវនាវឲ្យមានសភាពការណ៍នេះតទៅមុខទៀត ហើយថ្ងៃបោះឆ្នោតក្ដី រាប់សន្លឹកឆ្នោតក្ដី សូមឲ្យប្រកាសលទ្ធផលពិតប្រាកដ មិនប្រកាសដូចក្រសួងព័ត៌មានទេ គឺប្រកាសដោយ គ.ជ.ប»។
លោកបញ្ជាក់ថា ការតវ៉ាចំពោះលទ្ធផលឆ្នោត ឬភាពមិនប្រក្រតីណាមួយនោះ គឺអាស្រ័យលើឆន្ទៈពលរដ្ឋម្ចាស់ឆ្នោត ហើយគណបក្សមិនអាចទៅទាញពលរដ្ឋឲ្យតវ៉ា ឬជំទាស់ឆន្ទៈពួកគេឡើយ។ ប៉ុន្តែលោកជឿជាក់ថា បើការបោះឆ្នោតធ្វើឡើងដោយសេរី និងយុត្តិធម៌ គណបក្សសង្គ្រោះជាតិ នឹងទទួលបានសំឡេងគាំទ្រដូចការរំពឹងទុក ហើយពលរដ្ឋម្ចាស់ឆ្នោតនឹងទទួលយកដោយអស់ចិត្ត។
ចំណែកមន្ត្រីគណបក្សប្រជាជនកម្ពុជា និងជាដៃគូប្រកួតយ៉ាងស្វិតស្វាញជាមួយគណបក្សសង្គ្រោះជាតិ បានចំអកឲ្យគណបក្សប្រឆាំងនេះថា បើទោះបីជាខំប្រឹងនិយាយលួងលោមពលរដ្ឋម្ចាស់ឆ្នោតយ៉ាងណាក៏មិនអាចប្រមូលសំឡេងគាំទ្ររហូតដល់ ៦០% ដែរ ព្រោះកម្លាំងធ្លាប់រួបរួមគ្នា បានបែកទៅចូលរួមគណបក្សដទៃ និងបង្កើតបក្សថ្មី ប្រៀបដូចទឹកដែលធ្លាប់ពេញពាង ស្រកមកនៅកន្លះពាង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា កម្លាំងបក្សសង្គ្រោះជាតិ លែងខ្លាំងដូចកាលពីឆ្នាំ២០១៣ ដោយលោកមើលឃើញថា កម្លាំងសមាគមអ្នកប្រជាធិបតេយ្យរបស់លោក ម៉ម សូណង់ដូ ក្រុមលោក សួន សេរីរដ្ឋា សុទ្ធតែលែងគាំទ្រគណបក្សសង្គ្រោះជាតិ ស្រពពេលក្រុមប្រឹក្សាឃុំបក្សប្រឆាំងខ្លះ អស់ជំនឿ ហើយមករួមរស់ជាមួយគណបក្សប្រជាជន៖ «ឯកឧត្ដម កឹម សុខា និយាយអ៊ីចឹងវាគ្រាន់តែជាវោហារសាស្ត្រនយោបាយដើម្បីកម្លាំងចិត្តសមាជិកសមាជិកា ក៏ដូចជាលើកទឹកចិត្តដល់អ្នកគាំទ្ររបស់គាត់កុំឲ្យបាក់ទឹកចិត្តប៉ុណ្ណោះ។ យើងដឹងហើយថា ឆ្នាំ២០១៣ បក្សសង្គ្រោះជាតិ បានឡើងដល់ចំណុចកំពូលហើយ តែក្រោយការតវ៉ាជិតមួយឆ្នាំយើងឃើញថា កម្លាំងគាំទ្ររបស់គណបក្សសង្គ្រោះជាតិ លែងគាំទ្រគណបក្សនេះទៀតហើយ»។
លោក សុខ ឥសាន យល់ថា ពុំមានហេតុផលអ្វីផ្សេងទៀត ក្រៅពីលេសលុបលាងភាពបរាជ័យរបស់បក្សប្រឆាំងនោះទេ បើមានការតវ៉ាប្រឆាំងនឹងលទ្ធផលឆ្នោត ឬចោទថា គណៈកម្មាធិការជាតិរៀបចំការបោះឆ្នោត មិនឯករាជ្យនោះ។ កន្លងទៅគណបក្សទាំងពីរដែលមានអាសនៈក្នុងរដ្ឋសភា បានឯកភាពគ្នាធ្វើកំណែទម្រង់ប្រព័ន្ធបោះឆ្នោត និងសមាសភាព គ.ជ.ប ចប់សព្វគ្រប់អស់ហើយដែរ។
លោក សុខ ឥសាន រំលឹកថា ភាពចន្លោះប្រហោងទាក់ទងនឹងការបោះឆ្នោតកាលពីឆ្នាំ២០១៣ បានដាក់ចូលក្នុងច្បាប់ស្ដីពីការរៀបចំ និងប្រព្រឹត្តទៅនៃ គ.ជ.ប និងច្បាប់ស្ដីពីការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងបោះឆ្នោតជ្រើសរើសតំណាងរាស្ត្ររួចហើយ។ ដូច្នេះបើមានការតវ៉ាអ្វីកើតឡើងទៀតនោះ លោកចាត់ទុកថា ជាសកម្មភាពតវ៉ាបែបអានាធិបតេយ្យ៖ «អ៊ីចឹងអ្នកណាតវ៉ាតាមបែបអានាធិបតេយ្យ មិនទទួលស្គាល់លទ្ធផលបោះឆ្នោតជាលេសនេះ គឺថាត្រូវទទួលខុសត្រូវចំពោះមុខច្បាប់។ ខ្ញុំឧទាហរណ៍ទេ! ពេលមានការប្រកាសលទ្ធផលផ្លូវការពីគ.ជ.ប ហើយបើមិនបានចូលប្រជុំតាមការប្រជុំតាមការកោះអញ្ជើញតាមព្រះមហាក្សត្រទេ អានោះត្រូវបាត់បង់អាសនៈដោយស្វ័យប្រវត្តិ ហើយបើធ្វើសកម្មភាពអនាធិបតេយ្យខ្លាំងដូចឆ្នាំ២០១៣ អាហ្នឹងត្រូវបាត់បង់សិទ្ធិនយោបាយទាំងស្រុង»។
អ្នកស្រាវជ្រាវផ្នែកការអភិវឌ្ឍសង្គម លោក មាស នី បារម្ភថា បញ្ហាខ្លះអាចនឹងកើតមាន បើ គ.ជ.ប មិនបានត្រួតពិនិត្យការរៀបចំបោះឆ្នោតឲ្យបានត្រឹមត្រូវទៅតាមច្បាប់ ដោយលោកមើលឃើញថា គណបក្សនយោបាយខ្លះមិនបានគោរព ឬរំលោភទៅលើការណែនាំគ.ជ.ប។ ការតវ៉ាតែងតែកើតមាននៅក្នុងបរិបទនយោបាយកម្ពុជា តែការតវ៉ាមិនប្រាកដចេញតែពីបក្សប្រឆាំងនោះទេ៖ «អ្នកចាញ់តែងតែទាមទារអ្វីផ្សេងទៀត។ ខ្ញុំមិននិយាយថា CNRP ចាញ់ទេ តែបើ CPP ចាញ់ឆ្នោត ឬបាត់សន្លឹកឆ្នោតច្រើន ជួនកាលក៏អាចមានការតវ៉ាឡើងដែរបាទ! ហើយក៏យើងមិនអាចនិយាយថា ឲ្យតែអ្នកតវ៉ាចេញពីគណបក្សប្រឆាំងដែរ ព្រោះនេះជាវប្បធម៌មួយទៅហើយ»។
ចំពោះ លោក មាស នី ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិ៤ នេះ មើលឃើញថា គណបក្សប្រជាជនកម្ពុជា និងគណបក្សសង្គ្រោះជាតិ នឹងទទួលបានសំឡេងគាំទ្រប្រដំប្រសងគ្នា។
មានលទ្ធផលប្រដំប្រសងគ្នាដោយសារគណបក្សកាន់អំណាចមិនទាន់ធ្វើកំណែទម្រង់អ្វីបានជាដុំកំភួន និងការបំភិតបំភ័យរឿងសង្គ្រាមនៅមុនការបោះឆ្នោតដែលធ្វើឲ្យបន្តបាត់បង់សំឡេងគាំទ្រ។ចំណែកបក្សសង្គ្រោះជាតិ វិញ អាចស្រូបយកសំឡេងគាំទ្រសរុបប្រហែល ៤០% នៅក្នុងការបោះឆ្នោតលើកនេះ។ ហេតុផលដែលអាចស្រូបយកបាន ត្រូវបានលោកពន្យល់ថា អ្នកគាំទ្រគណបក្សសង្គ្រោះជាតិ ភាគច្រើន ជាពលរដ្ឋអស់ជំនឿលើបក្សកាន់អំណាចក្នុងការដោះស្រាយបញ្ហាធំៗ និងអ្នកមិនចូលចិត្តឲ្យអ្នកនយោបាយយកពួកគេធ្វើជាចំណាត់ខ្មាំងនយោបាយតាមរយៈការគំរាមកំហែងផ្សេងៗ៖ «ការមើលឃើញខុសគ្នា ខាងគណបក្សកាន់អំណាចហាក់ថា ការគំរាមនឹងអាចជួយឲ្យពលរដ្ឋងាកមកបោះឆ្នោតឲ្យគណបក្សប្រជាជនវិញ តែសម្រាប់ប្រជាជនទូទៅវិញយល់ឃើញថា ការគំរាមនេះហាក់យកគាត់ធ្វើជាចំណាត់ខ្មាំង»។
អ្នកវិភាគរូបនេះ បានមើលឃើញគណបក្សតូចៗពីរ កំពុងងើបឡើងដែរ គឺគណបក្សសម្ព័ន្ធដើម្បីប្រជាធិបតេយ្យ និងគណបក្សប្រជាធិបតេយ្យមូលដ្ឋាន ប៉ុន្តែលោកមិនប្រាកដថា អ្នកបោះឆ្នោតឲ្យគណបក្សទាំងពីរភាគច្រើនចេញពីអ្នកធ្លាប់គាំទ្រគណបក្សប្រជាជន ឬគណបក្សសង្គ្រោះជាតិ នោះទេ ដោយលោកឲ្យរង់ចាំអ៊ុតមើលទាំងអស់គ្នាថ្ងៃបោះឆ្នោត នៅថ្ងៃទី៤ ខែមិថុនា ឆ្នាំ២០១៧ ឆាប់ៗនេះ៕
ប្រភព៖ RFA Khmer
No comments:
Post a Comment