 |
| កម្មកររោងចក្រ អ៊ែជ្យាយល៍ ស្វេតថឺ (Agile Sweater) តវ៉ានៅមុខសាលាខេត្តកំពង់ស្ពឺ ទាមទារឲ្យតុលាការដោះលែងតំណាងកម្មករ ៥នាក់ដែលត្រូវបានចាប់ខ្លួន កាលពីថ្ងៃទី១២ ខែមករា ឆ្នាំ២០១៦។RFA/Sireymuny |
ប្រទេសកម្ពុជាមានរោងចក្រកាត់ដេរសំលៀកបំពាក់ និងផលិតស្បែកជើងជាង១ពាន់ (១០៧៩)
និងមានកម្លាំងពលកម្មបម្រើការងារក្នុងវិស័យនេះជិត៨សែននាក់ ដែលភាគច្រើនជាកូនចៅ របស់អ្នកស្រុកស្រែចម្ការ។ ដោយសារតែនៅពេលបោះឆ្នោតម្តងៗ កម្មករមួយចំនួនត្រូវធ្វើដំណើរត្រឡប់ទៅស្រុកកំណើតវិញដើម្បីបោះឆ្នោត ទើបបក្សប្រឆាំងមានការបារម្ភថា ប្រសិនបើថៅកែរោងចក្រមិនអនុញ្ញាតឲ្យពួកគេឈប់សម្រាកគ្រប់គ្រាន់ ដើម្បីធ្វើដំណើរទៅវិញទៅមកទេ កម្មករទាំងអស់នោះ នឹងបាត់បង់សិទ្ធិបោះឆ្នោតរបស់ខ្លួន។
ព្រោះតែការបារម្ភនេះហើយ ទើបគណបក្សសង្គ្រោះជាតិទទូចឲ្យ គ.ជ.ប ជំរុញទៅបណ្ដារោងចក្រ សហគ្រាស ផ្ដល់ថ្ងៃឈប់សម្រាកគ្រប់គ្រាន់ដល់កម្មករធ្វើដំណើរទៅបោះឆ្នោត។
ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ អ្នកស្រី ម៉េង សុភារី ឲ្យអាស៊ីសេរីដឹងនៅថ្ងៃទី២៧ ឧសភា ថា បក្សប្រឆាំងបានដាក់លិខិតទៅ គ.ជ.ប កាល ពីថ្ងៃទី២៦ ឧសភា ដើម្បីស្នើសុំបញ្ហានេះ។ អ្នកស្រីថ្លែងថា ដោយសារកាលពីពេលចុះឈ្មោះ បោះឆ្នោតឃើញមានកម្មករមួយចំនួនធំបានធ្វើដំណើរទៅចុះឈ្មោះនៅស្រុកកំណើត ដូច្នេះ ដើម្បីអាចទៅបោះឆ្នោតបាន លុះណាតែកម្មករទាំងអស់នោះទទួលនូវសិទ្ធិឈប់សម្រាកយ៉ាង ហោចណាស់ ២ ទៅ៣ថ្ងៃដែរ អាស្រ័យលើទីតាំងជិតឬឆ្ងាយ។ អ្នកស្រីបញ្ជាក់ថា បក្សប្រឆាំង ស្នើទៅ គ.ជ.ប នេះ គឺដើម្បីការពារសិទ្ធិបោះឆ្នោតរបស់កម្មករ៖ «ធម្មតាការជ្រើសរើសថ្នាក់ដឹកនាំមូលដ្ឋានវាទាល់តែប្រជាពលរដ្ឋនៅក្នុងមូលដ្ឋាននោះជាអ្នកសម្រេច ហើយបើប្រជាពលរដ្ឋក្នុងមូលដ្ឋានហ្នឹងមិនបានទៅជ្រើសរើសវាជារឿងមួយគួរឲ្យសោកស្ដាយ ហើយម្យ៉ាងវិញទៀត ក្នុងនាមជាពលរដ្ឋខ្មែរម្នាក់មិនគួរណាបាត់បង់សិទ្ធិបោះឆ្នោត ជាពិសេសក្នុងខណៈដែលគាត់មានឈ្មោះក្នុងបញ្ជីបោះឆ្នោតរួចហើយ បែរជាមិនអាចទៅបោះឆ្នោតបានដោយសារតែពុំមានការអនុញ្ញាត ឬពុំបានបង្កលក្ខណៈ ឬក៏ផ្ដល់ឱកាសពួកគាត់ទៅបោះឆ្នោតក្នុងខណៈដែលអាចធ្វើបាន»។
កាលពីថ្ងៃទី២៤ ឧសភា គ.ជ.ប ក៏បានចេញសេចក្ដីអំពាវនាវចំពោះគ្រប់ម្ចាស់សហគ្រាស ក្រុមហ៊ុន រោងចក្រ សណ្ឋាគារ ភោជនីយដ្ឋាន និងគ្រឹះស្ថានទាំងអស់នៅកម្ពុជា ជួយសម្រួល និងបង្កលក្ខណៈងាយស្រួលដើម្បីអនុញ្ញាតឲ្យកម្មករ និយោជិក ធ្វើដំណើរទៅបោះឆ្នោតនៅ តាមឃុំ-សង្កាត់ ដែលពួកគេបានទៅចុះឈ្មោះបោះឆ្នោត។ ទោះជាយ៉ាងណា អ្នកស្រី ម៉េង សុភារី យល់ថា ការអំពាវនាវនេះអាចមិនមានប្រសិទ្ធភាពឡើយ ដោយសារតែវាមិនមែនជា ការដាក់កំហិតដែលតម្រូវឲ្យម្ចាស់សហគ្រាសអនុវត្តតាម។ អ្នកស្រី ម៉េង សុភារី ក៏ជំរុញទៅក្រសួងការងារយកចិត្តទុកដាក់ដោះស្រាយបញ្ហានេះ។
បញ្ហាកម្មករមិនមានពេលឈប់គ្រាន់គ្រាន់ដើម្បីធ្វើដំណើរជារឿងមួយ តែបញ្ហាកម្មករមិនមាន លុយធ្វើដំណើរទៅបោះឆ្នោត ដោយសារតែមិនទាន់បើកប្រាក់ខែជារឿងមួយផ្សេងទៀត ដែលសហជីពក៏បានសម្ដែងការបារម្ភ។
កាលពីថ្ងៃទី២៣ ឧសភា សហជីពសេរីកម្មករបានដាក់ពាក្យស្នើទៅកាន់រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ជួយអន្តរាគមន៍ទៅម្ចាស់រោងចក្រ សហគ្រាស សណ្ឋាគារ និង ភោជនីយដ្ឋាន បើកប្រាក់ឈ្នួលមុនកំណត់ដល់កម្មករ និយោជិក ដើម្បីធ្វើដំណើរទៅបោះឆ្នោត ព្រមទាំងត្រូវរក្សានូវប្រាក់បំណាច់ផ្សេងៗ របស់កម្មករសម្រាប់ទៅចូលរួមបោះឆ្នោត។ សហជីពថា បើក្រសួងមិនជូនដំណឹងទៅរោងចក្រ សហគ្រាស នោះទេ វាជាទង្វើខុសច្បាប់។
ការបារម្ភរបស់បក្សប្រឆាំង និងសហជីព ស្របពេលដែលកម្មករមួយចំនួនអះអាងថា ថៅកែ រោងចក្រមិនឲ្យពួកគេឈប់គ្រប់គ្រាន់ដើម្បីធ្វើដំណើរទៅបោះឆ្នោតឡើយ។ ក្នុងពេលជាមួយគ្នា មានសហគ្រាសខ្លះអនុញ្ញាតឲ្យកម្មករឈប់សម្រាកបាន ២ ទៅ ៣ថ្ងៃ ដើម្បីទៅបោះឆ្នោតដែរ ប៉ុន្តែសហគ្រាសនឹងកាត់ការឈប់សម្រាកប្រចាំឆ្នាំជំនួសវិញ។
ឆ្លើយតបចំពោះបញ្ហានេះ អ្នកនាំពាក្យ គ.ជ.ប លោក ហង្ស ពុទ្ធា ថ្លែងថា គ.ជ.ប នឹងបើកកិច្ចប្រជុំនៅថ្ងៃទី២៩ ឧសភា ដើម្បីពិភាក្សាសំណើរបស់បក្សប្រឆាំង។ ចំពោះលទ្ធផលយ៉ាងណា នោះ គ.ជ.ប នឹងឲ្យដឹងនៅថ្ងៃនោះ៖ «គ.ជ.ប នឹងរៀបចំការប្រជុំរវាងសមាសភាពគ.ជ.ប ទាំង៩រូប ហើយក៏អត់ទាន់យឺតពេលដែរ បើសិនជាមានការសម្រេចចិត្តយ៉ាងណា ចាំជូនព័ត៌មាននៅពេលក្រោយទៀត»។
អាស៊ីសេរីនៅមិនទាន់អាចសុំការឆ្លើយតបពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បាននៅឡើយទេ នៅថ្ងៃទី២៧ ឧសភា ដោយទូរស័ព្ទចូលមិនមានអ្នកលើក។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងប្រព្រឹត្តទៅនៅថ្ងៃទី៤ មិថុនា ដោយមាន គណបក្សចំនួន១២ ចូលរួមប្រកួតប្រជែងដណ្ដើមយកអាសនៈក្រុមប្រឹក្សាឃុំ-សង្កាត់ សរុបទាំងអស់១.៦៤៦ ទូទាំងប្រទេស៕
ប្រភព៖ RFA Khmer
No comments:
Post a Comment