 |
| អនុប្រធានគណបក្សសង្គ្រោះជាតិ លោក កឹម សុខា ថ្លែងនៅក្នុងទីស្នាក់ការគណបក្សនាសង្កាត់ចាក់អង្រែលើ នារាជធានីភ្នំពេញ កាលពីថ្ងៃទី៣០ ខែឧសភា ឆ្នាំ២០១៦។ RFA/Brach Chev |
ប្រធានស្ដីទីគណបក្សសង្រ្គោះជាតិ លោក កឹម សុខា អំពាវនាវតាមរយៈទំព័រហ្វេសប៊ុក (Facebook) របស់លោក នៅព្រឹកថ្ងៃទី៩ ខែកក្កដា អោយអ្នកនយោបាយខ្មែររិះរកមធ្យោបាយដោះស្រាយការខ្វែងគំនិតគ្នារវាង ខ្មែរនិងខ្មែរ បើមិនចង់អោយបរទេសលូកដៃ។
លោក កឹម សុខា ចោទសួរថា តើខ្មែរយើងអាចដោះស្រាយបញ្ហារវាងខ្មែរនិងខ្មែរបាន ឬទេ? លោកបន្តថា កន្លងមក ពេលណាភាគីនយោបាយខ្មែរឈ្លោះគ្នាកាន់តែខ្លាំង បរទេសក៏ចូលអន្តរាគមន៍កាន់តែច្រើន ទោះបីគេចូលក្នុងគោលបំណងល្អ ឬមិនល្អក៏ដោយ។ លោកសរសេរទៀតថា ប្រសិនបើវិបត្តិនយោបាយនេះឲ្យអូសបន្លាយ ឬរាលដាលកាន់តែខ្លាំង កម្ពុជាចៀសមិនផុតពីអន្តរជាតិលូកដៃចូលអន្តរាគមន៍មិនខានឡើយ។
ស្របគ្នានេះ តំណាងរាស្ត្រគណបក្សសង្គ្រោះជាតិ រំពឹងថា បញ្ហាកំពុងតែជាប់គាំងសព្វថ្ងៃនេះ គណបក្សធំៗទាំងពីរអាចនឹងរកច្រកចេញ ដើម្បីដោះស្រាយវិបត្តិនយោបាយដែលបានអូសបន្លាយដ៏រ៉ាំរ៉ៃក្នុង រយៈពេលកន្លងមកនេះ។
ថ្លែងទៅកាន់អ្នកគាំទ្រក្នុងទីស្នាក់ការកណ្ដាលនាស្កាត់ ចាក់អង្រែលើ នៅព្រឹកថ្ងៃទី៩ ខែកក្កដា លោក គង់ បូរ៉ា មានជំនឿថា បញ្ហាដែលកំពុងកើតឡើងនេះ បក្សនយោបាយធំៗទាំងពីរពិតជាវិលទៅតុចរចាពេលណាមួយបាន។
តំណាងរាស្ត្រមណ្ឌលព្រៃវែងរូបនេះ ប្រៀបធៀបថា មិនខុសពីគ្រួសារមួយឡើយ បើកើតបញ្ហាហើយគឺមានតែពឹងអាជ្ញាធរឲ្យជួយដោះស្រាយ។ ក្នុងន័យនេះ លោក គង់ បូរ៉ា ចាត់ទុកថា មិនខុសពីគណបក្សប្រឆាំងឡើយ ប្រសិនវិបត្តិនេះ បក្សទាំងពីរនៅតែមិនអាចរកច្រករួមមួយ ដើម្បីបញ្ចប់បញ្ហាទេ មធ្យោបាយចុងក្រោយមានតែពឹងបរទេសប៉ុណ្ណោះ៖ «គោល ជំហររបស់គណបក្សសង្គ្រោះជាតិគឺត្រូវការឲ្យខ្មែរភាគីទាំងពីរ ដោះស្រាយរវាងខ្មែរនិងខ្មែរ។ ឧទាហរណ៍ថា ក្នុងគ្រួសារមួយបើមេគ្រួសារអាងខ្លួនមានអំណាច ទៅសង្កត់សង្កិនមកធ្វើបាបសមាជិកក្រុមគ្រួសារ នោះច្បាស់ជាសមាជិកក្រុមគ្រួសាររត់ទៅពឹងសមត្ថកិច្ចឲ្យជួយ ដោះស្រាយហើយ»។
សមាជិករបស់រដ្ឋាភិបាលបញ្ជាក់ជំហរថា បក្សទាំងពីរនឹងមិនមានការជួបគ្នាដូចដែលបក្សប្រឆាំងចង់បាននោះ ទេ។ មិនតែប៉ុណ្ណោះ បើការចរចាណាមួយដែលយកអ្នកជាប់ឃុំមកដាក់សម្ពាធថែមទៀត នោះរឹតតែពុំមែនជាជម្រើសដែលគណបក្សគ្រប់គ្រងរដ្ឋាភិបាលត្រូវ ពិចារណាថែមទៀតផង។
លោក សុខ ឥសាន មន្ត្រីនាំពាក្យគណបក្សប្រជាជនកម្ពុជា បញ្ជាក់ថា បក្សដែលគ្របគ្រងរដ្ឋាភិបាល ពុំដែលនឹកទៅរកតុចរចាសោះឡើយ។ លោកបន្តថា ក្នុងដំណាក់កាលនៃយុត្តាធិការរបស់តុលាការកំពុងតែដំណើរការរឿងក្តី បក្សប្រឆាំងទាំងអំបាលម៉ាននេះ គណបក្សប្រជាជនកម្ពុជា ពុំអាចលូកដៃ ឬផ្ដួចផ្ដើមនាំឲ្យមានកិច្ចចរចានោះបានទេ ព្រោះដើម្បីចៀសវាងការចោទប្រកាន់ណាមួយថា បក្សកាន់អំណាចជ្រៀតជ្រែកដល់នីតិវិធីរបស់តុលាការ៖ «និយាយរួមជំហរ គណបក្សប្រជាជននៅដដែលទេ អត់មានត្រូវការជួបអីទេក្នុងពេលដែលតុលាការកំពុងដំណើរការ នីតិវិធីរបស់ខ្លួនចំពោះជនប្រព្រឹត្តបទល្មើសច្បាប់ប៉ុន្មាននាក់ ហ្នឹង»។
ស្របពេលអ្នកនយោបាយបន្តខ្វែងគំនិតគ្នាលើជម្លោះនយោបាយនេះ អ្នកវិភាគយល់ឃើញថា ជាជម្រើសគណបក្សប្រឆាំងត្រូវរក្សាជំហរនៅស្ងៀមស្ងាត់វិញ ជាជាងផ្ដួចផ្ដើមនាំឲ្យមានការចរចាផ្នែកនយោបាយ។
លោក កែម ឡី អ្នកវិភាគបញ្ហាសង្គមមើលឃើញថា គណបក្សប្រឆាំងបើកចរចានៅពេលនេះ ក៏នឹងមិនបានចំណេញអ្វីប៉ុន្មាននោះឡើយ។ យ៉ាងហោចណាស់បក្សនយោបាយទាំងពីរបានត្រឹមអង្គុយ ហើយលើកយកបញ្ហាដែលវាពុំមែនជាដំណោះស្រាយដែលខ្លួនចង់បានថែមទៀត ផង។ លោក កែម ឡី យល់ថា អ្វីដែលបក្សប្រឆាំងត្រូវធ្វើនោះគឺរៀបចំខ្លួនធ្វើយ៉ាងណាត្រៀម យុទ្ធសាស្ត្រក្នុងការបោះឆ្នោត និងបង្កើនធនធានឲ្យបានគ្រប់គ្រាន់ក្នុងការដណ្ដើមជ័យជំនះនៅពេល បោះឆ្នោតវិញ៖ «ខ្ញុំមើលទៅគណបក្សក្រៅរដ្ឋាភិបាលវាគួរតែត្រៀម ខ្លួន ឲ្យខ្ពស់ជាងការបន្ធូរបន្ថយឥរិយាបថ ទី១ ត្រូវរៀបចំគោលនយោបាយ រៀបចំកំណែទម្រង់គណបក្ស និងត្រៀមខ្លួនរបៀបដឹកនាំប្រទេសនៅអាណត្តិក្រោយ»។
កាលពីថ្ងៃខែកញ្ញា ឆ្នាំ២០១៥ ប្រមុខរដ្ឋាភិបាលបញ្ជាក់ជំហរថា លោកមិនត្រូវការចរចាណាមួយជាមួយបក្សប្រឆាំងដែលទាមទារឲ្យមាន ជំនួប ប៉ុន្តែចិត្តមិនស្មោះត្រង់នោះឡើយ។ លោក ហ៊ុន សែន អះអាងថា កិច្ចសន្ទនានេះមិនចាំបាច់តែជាមួយបក្សប្រឆាំង ពោលគឺនៅមានដៃគូសន្ទនាដែលមានបក្សនយោបាយប្រមាណ ៥០គណបក្សផ្សេងពីនេះទៀត ដែលលោកត្រូវធ្វើការជាមួយ។
អ្នកវិភាគសង្គមមើលឃើញថា គណបក្សនយោបាយទាំងពីរតាំងពីដើមរៀងមកប្រៀបដូចទឹកនិងប្រេងយ៉ាង ដូច្នោះ។ គេមិនរំពឹងថា ប្រសិនបើមានការចរចាត្រូវរ៉ូវគ្នាមែន មិនប្រាកដបក្សទាំងពីរអាចនឹងអង្គុយធ្វើការជាមួយគ្នាបានណាស់។ ម្ខាងព្យាយាមរកចំណុចខ្សោយ ឬឯម្ខាងទៀត មិនដែលទទួលកំហុសលើសពីនេះ ជាញឹកញាប់តែងប្រើប្រាស់ប្រពន្ធតុលាការក្នុងការដាក់សម្ពាធ៕
2016-07-09 ដោយ ម៉ម មុនីរតន៍
No comments:
Post a Comment