 |
| ស្លាកសញ្ញាគណបក្សសង្គ្រោះជាតិ ដែលអាជ្ញាធរជូនដំណឹងឲ្យរុះរើ ឋិតនៅក្បែររង្វង់មូលចាស់ នៅថ្ងៃទី៨ ខែកញ្ញា ឆ្នាំ២០១៦។ RFA/Men Sothyr |
អ្នកច្បាប់ និងអ្នកវិភាគនយោបាយយល់ថា គណបក្សប្រឆាំងគួរគិតគូរផ្លាស់ប្ដូររូបលោក សម រង្ស៊ី ចេញពីស្លាករបស់គណបក្ស ដើម្បីការពារគណបក្សសង្គ្រោះជាតិ ជៀសវាងការរំលាយចោលនៅពេលច្បាប់ស្ដីពីគណបក្សនយោបាយថ្មី ដែលហាមទណ្ឌិតកុំឲ្យលូកលាន់ក្នុងកិច្ចការគណបក្សនយោបាយចូលជាធរមាននាពេលខាងមុខ។ ប៉ុន្តែមន្ត្រីគណបក្សប្រឆាំងថា នៅពេលនេះគណបក្សសង្គ្រោះជាតិ មិនទាន់គិតគូររឿងនេះនៅឡើយទេ។
អ្នកវិភាគនយោបាយ លោក សូ ចន្ថា យល់ថា រូបលោក សម រង្ស៊ី ចាប់ដៃជាមួយលោក កឹម សុខា ដែលគណបក្សសង្គ្រោះជាតិ ដាក់តាំងបង្ហាញនៅទីសាធារណៈ ហើយដែលគណបក្សអាចនឹង
ផ្លាស់ប្ដូរចេញនៅពេលច្បាប់ស្ដីពីគណបក្សនយោបាយថ្មីចូលជាធរមាន។ លោកថា គណបក្សសង្គ្រោះជាតិ គួរដាក់សញ្ញាព្រះអាទិត្យរះដែលជាស្លាកសញ្ញារបស់គណបក្ស ល្អជាងដាក់លោក កឹម សុខា ឬបុគ្គលផ្សេង។
 |
សាស្ត្រាចារ្យផ្នែកវិទ្យាសាស្ត្រនយោបាយ
លោក សូ ចន្ថា ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី
កាលពីយប់ថ្ងៃទី២៣ ខែតុលា ឆ្នាំ២០១៥។ Photo: RFA
|
រីឯប្រធានការិយាល័យមេធាវីក្រុមអ្នកច្បាប់អមរិន្ទ្រ លោកមេធាវី សុក សំអឿន យល់ថា ផ្អែកលើខ្លឹមសារច្បាប់នេះ គណបក្សសង្គ្រោះជាតិ ត្រូវកាត់ផ្តាច់ទំនាក់ទំនងជាមួយលោក សម រង្ស៊ី ទាំងទំនាក់ទំនងផ្លូវការ និងទំនាក់ទំនងឯកជន ដែលជាទំនាក់ទំនងនៃមន្ត្រីគណបក្សនេះជាមួយលោក សម រង្ស៊ី។
ដោយឡែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថាគណបក្សមិនទាន់គិតគូររឿងនេះទេ៖ «បើសិនជាអាចជូនជាព័ត៌មានបាន ខ្ញុំនឹងជូនដំណឹងនៅពេលក្រោយ»។
សារព័ត៌មានមួយចំនួនទម្លាយថា លោក កឹម សុខា ជាប្រធានគណបក្សសង្គ្រោះជាតិ ដឹកនាំមន្ត្រីជាន់ខ្ពស់មួយចំនួនទៅប្រជុំជាមួយលោក សម រង្ស៊ី អតីតប្រធានគណបក្សនេះនៅទីក្រុងហុងកុង ប៉ុន្តែគេមិនដឹងពីប្រធានបទនៃកិច្ចពិភាក្សានោះទេ។
រីឯអ្នកនាំពាក្យគណបក្សសង្គ្រោះជាតិ លោក យឹម សុវណ្ណ ថាលោកមិនដឹងរឿងនេះទេ។
កិច្ចប្រជុំរដ្ឋសភាដែលមានតែតំណាងរាស្ត្របក្សកាន់អំណាច នៅព្រឹកថ្ងៃទី១០ ខែកក្កដា បានអនុម័តប្រកបដោយជោគជ័យលើខ្លឹមសារថ្មីនៃច្បាប់ស្ដីពីគណបក្សនយោបាយ ដែលមានបំណងហាមទណ្ឌិតកុំឲ្យលូកលាន់ក្នុងកិច្ចការគណបក្សនយោបាយតទៅទៀត ទោះបីជាមានការរិះគន់ និងគ្មានវត្តមានតំណាងរាស្ត្របក្សប្រឆាំងក្ដី។
ខ្លឹមសារនៃច្បាប់នេះ ហាមគ្រប់គណបក្សនយោបាយមិនត្រូវធ្វើសកម្មភាពប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយសម្រាប់គណបក្សរបស់ខ្លួន។ មិនត្រូវយល់ព្រមដោយចំហ ឬឃុបឃិតជាមួយទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ឲ្យធ្វើសកម្មភាពណាមួយដើម្បីជាផលប្រយោជន៍នយោបាយសម្រាប់គណបក្សរបស់ខ្លួន។
ចំពោះទោសទណ្ឌដល់គណបក្សនយោបាយដែលបានប្រព្រឹត្តផ្ទុយពីច្បាប់នេះវិញ គឺតុលាការអាចសម្រេចផ្អាកសកម្មភាពគណបក្សនយោបាយនោះមិនលើសពី ៥ឆ្នាំ ឬអាចរំលាយគណបក្សនោះចោលតែម្តង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា ច្បាប់ស្ដីពីគណបក្សនយោបាយថ្មី នឹងដល់ដៃគណៈកម្មការជំនាញព្រឹទ្ធសភានៅថ្ងៃទី១៤ ខែកក្កដា។ លោកបន្តថា នៅពេលឆ្លងគណៈកម្មការជំនាញរួចហើយ ចូលដល់គណៈកម្មាធិការអចិន្ត្រៃយ៍ ហើយនៅពេលគណៈកម្មាធិការអចិន្ត្រៃយ៍ពិនិត្យរួចហើយ នឹងកំណត់ប្រជុំពេញអង្គដើម្បីអនុម័ត។ ឆ្លងផុតព្រឹទ្ធសភា លោក សុខ ឥសាន ថាច្បាប់នេះនឹងបញ្ជូនទៅក្រុមប្រឹក្សាធម្មនុញ្ញដើម្បីពិនិត្យធម្មនុញ្ញភាពនៃច្បាប់ បន្ទាប់មកទៀត ក្រុមប្រឹក្សាធម្មនុញ្ញនឹងបញ្ជូនមករដ្ឋសភាវិញ ទើបរដ្ឋសភាយកច្បាប់នេះថ្វាយព្រះមហាក្សត្រសម្រេចចុងក្រោយ។
ច្បាប់ស្ដីពីគណបក្សនយោបាយថ្មី នឹងត្រូវអនុវត្តក្រោយ ៩០ថ្ងៃ ឬ ៣ខែក្រោយច្បាប់នេះចូលជាធរមាន។
លោក សុខ ឥសាន មិនទាន់ហ៊ានអះអាងថា តើច្បាប់នេះត្រូវការរយៈពេលប៉ុន្មានទើបអាចចូលធរមានបានទេ។
ចំណែកអនុប្រធានគណបក្សសង្គ្រោះជាតិ លោក អេង ឆៃអ៊ាង បានផ្តល់សម្ភាសឲ្យវិទ្យុបារាំងអន្តរជាតិថា តំណាងរាស្ត្ររបស់គណបក្សសង្គ្រោះជាតិ ទាំងអស់ នឹងសរសេរលិខិតថ្វាយព្រះមហាក្សត្រនៅចុងសប្ដាហ៍នេះ សុំកុំឲ្យព្រះអង្គឡាយព្រះហស្តលេខាលើវិសោធនកម្មច្បាប់ស្ដីពីគណបក្សនយោបាយ។
ទាក់ទងច្បាប់ស្ដីពីគណបក្សនយោបាយនេះដែរ កាលពីគណបក្សប្រជាជនកម្ពុជា ធ្វើវិសោធនកម្មលើកទី១ កាលពីដើមឆ្នាំ២០១៧ ព្រះមហាក្សត្រទ្រង់មិនឡាយព្រះហស្តលេខាទេ ព្រោះទ្រង់យាងចេញទៅប្រទេសចិន ដើម្បីពិនិត្យព្រះសុខភាព។ កាលនោះ ប្រធានព្រឹទ្ធសភា ដែលមាននាទីជាប្រមុខរដ្ឋសភាស្តីទី គឺលោក សាយ ឈុំ ដែលលោកជាអនុប្រធានគណបក្សប្រជាជនកម្ពុជា ជាអ្នកចុះហត្ថលេខា។
អតីតប្រធានគណបក្សសង្គ្រោះជាតិ លោក សម រង្ស៊ី ចោទប្រកាន់លោកនាយករដ្ឋមន្ត្រី ហ៊ុន សែន ថាក្នុងរយៈពេលជិត ៣ទសវត្សរ៍ហើយដែលលោក ហ៊ុន សែន តែងព្យាយាមសម្លាប់រូបលោក និងជីវិតនយោបាយរបស់លោកជាបន្តបន្ទាប់។ លោក សម រង្ស៊ី ស្នើទៅលោក ហ៊ុន សែន យកពេលវេលា និងកម្លាំងធ្វើការងារដែលមានប្រយោជន៍ជាងនេះសម្រាប់ប្រទេសជាតិ៕
ប្រភព៖ RFA Khmer
No comments:
Post a Comment